齋睇個戲名以為係懸疑驚悚片,睇完之後就發覺佢又唔懸疑又唔驚悚,其實呢個劇本就真係寫得衰過黃導演嘅上一套戲《麥路人》,同樣係鄭保瑞監製,出嚟嘅效果就差咗唔少,《麥路人》入面嘅煽情煽到嚟呢套,真係煽少陣都唔得嘅,呢啲橋你唔悶我都悶啦。個劇本寫到咁低質,入面搞咁多特技都冇膠用啦,啲死人特技懶叻咁,應該就想幫啲觀眾容易啲理解,不過真係就做多咗,執好個劇本佢仲好過啦。查實年年咁嘅類型電影換個殼就開得成一套,幾好搵啊!不過黃百鳴嗰套《反貪風暴》都拍到第五集啦,呢套起碼都要拍番套叫《斷奶》嘅續集,講班細路仔冇奶飲,皆因啲奶入面有三聚氰胺,有條友就搏命整走啲三聚氰胺佢,等大家有番奶飲,咁咪仲寫實~
個人評分:5.0/10